(1887, Göyçay r-nu–1920) – Azərb. milli azadlıq hərəkatının iştirakçılarından biri, AXC Parlamentinin üzvü.
1920 ilə aid Sovet hakimiyyəti Xüsusi şöbənin istintaq sənədlərində onun yaşı 27 göstərildiyindən, anadan olduğu ilin 1887 il deyil, 1893 il olduğu etimal olunur. Azərb. Resp. Prokurorluğunun 29/853 saylı 10.2.1993 il tarixli arayışında da onun 1893 ildə anadan olduğu qeyd olunması da bu etimalı daha da artırır. 15 dekabr 1918 il – 27 aprel 1920 il tarixlərində Göyçay qəz.-dan AXC Parlamentinin deputatı seçilib. Parlamentdə Əhrar Fraksiyasında təmsil olunan 8 deputatdan biri kimi Etibarnamə və Maliyyə və Büdcə Komissiyalarının üzvü olub.
1920 ilin martında ermənilərin Qarabağda dövlət əleyhinə başladılan qiyamın yatırılmasında fəal iştirak edib. Sovet Rusiyasının Azərbaycan Xalq Cümhuriyyətini işğal etməsindən (27 aprel 1920 il) dərhal sonra həbs olunub. 7 saylı xüsusi şöbənin müstəntiqinin 1920 il 3 iyun tarixli qərarı ilə güllələnməyə məhkum edilib və hökm icra edilib. Tarixi faktlar sübut edir ki, Əfəndiyevin güllələnərkən cəmi 27 yaşı olub (29/853 saylı 10.2.1993 cü il tarixli arayış). Azərb. Resp. Prokurorluğu SSRİ Ali Soveti Rəyasət Heyətinin 16.1.1989 il tarixli “1930-40 və 50 illərin əvvəllərində represiya qurbanları haqqında ədalətin bərpa edilməsi barədə əlavə tədbirlər haqqında” fərmanının I maddəsinə əsasən Əfəndiyevə 05.1.1993 ildə bəraət verilib.
Əfəndiyevin Göyçay ş. mərkəzindəki ikimərtəbəli evi sovet rejimi tərəfindən müsadirə olunaraq dəri zöhrəvi dispanserinə (xalq arasında buna Keçəllər xəstəxanası deyilirdi) verilib. Sonradan həmin binanın ikinci mərtəbəsində Əfəndiyevin oğlu Tofiq Abdullayevin ailəsinin yaşamasına icazə verilib. Bundan başqa, onun Göyçay ş.-də “İqbal” adlı kitab və dəftərxana ləvazimatı mağazası fəaliyyət göstərib.
Əd.: 1. Azərbaycan Xalq Cümhuriyyəti Ensiklopediyası, I cild, Bakı, “Lider Nəşriyyat”, 2004, s.348
2. M.Zülfüqarlı. “Göyçay tarixi”. Bakı, 2022, s.163-164;
3. M.Zülfüqarlı “Azərbaycan Xalq Cümhuriyyətinin Göyçaylı deputatı – Hacı Hüseyn Hacı Abdulla oğlu Əfəndiyev (1887–1920)”. Bakı, 2023
