(21.7.1954, Göyçay r-nunun Alpout k. – 16.1.2020, Bakı ş.) – publisist, pedaqoq, pedaqogika ü.f.d. (2000), AJB-nin üzvü.

APİ-nin (indiki ADPU) Filologiya fakültəsini (1973) və Azərb. Resp. Prezidenti yanında Dövlət İdarəçilik Akademiyasını (1986) bitirib. Əmək fəaliyyətinə Göyçay r-nunun Alpout k.-də müəllim kimi başlamış (1973-80), Göyçay r-n Komsomol Komitəsinin birinci katibi, respublika LKGİ Mərkəzi Komitəsinin üzvü olmuşdur. Daha sonra “Respublika” qəzetinin bölgə müxbiri (1996–2009), “Respublika” qəzeti baş redaktorunun birinci müavini vəzifələrində çalışıb.

(28.8.1946, Göyçay ş.) – fizika-riyaziyyat ü.f.d. (1976), dos. (2006).

1953-64 illərdə Göyçay ş. 1 saylı orta məktəbində oxuyub. 1964-69 illərdə BDU-nun Mexanika-riyaziyyat fakültəsinin əyani şöbəsində təhsil alıb. 1970-72 illərdə Fizika fakültəsində aspirant, 1973-78 illərdə müəllim, 1978-88 illərdə baş müəllim kimi çalışıb. 1988–2005 illərdə Fizika fakültəsində, 2006 ildən bu günədək Mexanika-riyaziyyat fakültəsində dos. vəzifəsində çalışır. 1976 ildə “Hiperbolik tip qeyri-xətti tənliklərin dövri və sanki dövri həlləri” mövzusunda dissertasiya müdafiə edərək fizika-riyaziyyat e.ü.f.d. alimlik dərəcəsi alıb.

Məlumat V.Abdullayevdən alınıb.

(31.5.1982, Göyçay ş.) – diplomat, hüquqşünas, hüquq ü.f.d. (2010).

Göyçay ş. 3 saylı orta məktəbini “əla” qiymətlərlə (1999), BDU-nun Beynəlxalq hüquq fakültəsini “Fərqlənmə diplomu” ilə bitirib (2003). 2003 ildə BDU-nun Beynəlxalq hüquq fakültəsinin magistratura bölməsinə keçirilən imtahanlarda yüksək nəticə göstərərək qəbul olunub və 2005 ildə “Fərqlənmə diplomu” ilə magistraturanı bitirib. Eyni zamanda BDU-nun rektoru tərəfindən “Təhsil, təlim və tərbiyə sahəsində nümunəvi davranışına görə xüsusi diplom” ilə də təltif edilib. 2006-09 ildə BDU-nun Beynəlxalq hüquq fakültəsinin aspirantura bölməsinə qəbul olub. 2010 ildə “Qloballaşan dünyada öz müqəddəratını təyin etmənin beynəlxalq hüquqi problemləri” mövzusunda dissertasiya müdafiə edərək Azərb. Resp. Prezidenti yanında Ali Attestasiya Komissiyasının qərarı ilə “Hüquq e.ü.f.d.” elmi dərəcəsi alıb.

Göyçay r-nunun qədim insan məskənlərindən olduğunu bildirən dəlillərdən biri də bir çox kəndlərdə islamiyyətə qədərki inancları özündə əks etdirən pir və ocaqların mövcudluğudur. Bəzi ağacların müqəddəs hesab edilməsi, onların qorunub saxlanması, onlara sitayişin şüurların alt qatında hələ də yaşaması göstərir ki, Göyçayın bir çox kəndlərinin tarixi islamiyyətdən xeyli əvvəllərə gedib çıxır.

Göyçayın bir sıra kəndlərində – Məlikkənd k.-də Pir qovaq, Qızılağac k.-də İydə piri, Qarabağlar k.-də Əncir piri, Kürdşaban k.-də Pir qarağac və s. göstərmək olar.

Göyçay r-nunun Bığır k.-də müqəddəs inanc yeri kimi tanınan tarixi qocaman palıd ağacı. Bu palıd ağacının 500 ildən çox yaşı vardır. Ağacın hündürlüyü 20 metr, diametri 180 santimetrdir. 1968 ildən üzərinə lövhə vurulan bu ağac tarixi abidə kimi qorunub saxlanılır. Pir palıd haqqında bir çox rəvayətlər vardır ki, onlardan biri belədir:

“Deyilənə görə, Allahın böyük övliyası Şeyx Ami həzrətləri gəlib burada məskən salır. Burada o, bir qıza aşiq olur. Qız da ona vurulur. Onların məhəbbətləri ilahi məhəbbət olduğu üçün Şeyx də, qız da od tutub yanırlar. Bu pir palıdın yerində onları bir məzara qoyurlar. Həmin vaxtdan bura müqəddəs ziyarətgaha çevrilir. Sonralar bir quşun dimdiyindən bir palıd qozası düşüb burada bitir. Elə o zamandan bu palıda “Pir palıd” deyirlər”.

Mənbə: İ.Musayev. “Göyçay rayonundakı dini abidələr və tarixi şəxsiyyətlər”, Bakı, “İpəkyolu”, 2014, s.114.

Erməni-bolşevik qüvvələrinin 1918 ildə törətdiyi mart soyqırımı və vəhşilikləri haqqında çox yazılsa da, soyqırımı törədən cinayətkarlara qarşı əhalinin müqaviməti, göstərdiyi qəhrəmanlıqlar tədqiqiata çox az cəlb edilib. Göyçay döyüşlərinə qədər erməni quldurlarına qarşı müqavimətin nümunəsi kimi Ağsu yaxınlığında erməni quldurlarından müdafiə məqsədilə baş verən Pirəmşaq döyüşünü göstərmək olar. Pirəmşaq döyüşünü 1918 ildə erməni soyqırımına qarşı təşkil edilən ilk ən böyük müdafiə döyüşü adlandırmaq olar. Çünki Şamaxıda, Bakıda, Qubada və s. yerlərdə erməni soyqırımı baş verməzdən əvvəl, erməni vəhşiliklərini qabaqcadan görən qeyrətli insanlar müdafiə döyüşünü təşkil ediblər. Pirəmşaq döyüşünə səbəb 1918 il martın əvvəllərində rus-türk cəbhəsindən geri dönən 400 nəfər erməni əsgərinin Kürdəmirdən Ağsu istiqamətində Şamaxıya qayıdarkən törətdikləri vəhşiliklər olub.

(8.1.1975, Göyçay r-nunun Çərəkə k. – 1.1.1994, Füzuli r-nu) – Birinci Qarabağ müharibəsində itkin düşübdür.

29.4.1993 il tarixdə əsgər rütbəsində hərbi xidmətə çağırılmışdır. 1.1.1994 il tarixdə itkin düşüb. Göyçay r-n məhkəməsinin 2001 il tarixli qətnaməsinə əsasən ona şəhid statusu verilib.

Mənbə: Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti Göyçay rayon şöbəsi.

(8.12.1946, Göyçay ş. – 21.2.1988, Bakı ş.) – Azərb.-da balet sənətinin tanınmış simalarından biri, Azərb. SSR-in Xalq artisti (1978).

Bakı Xoreoqrafiya Məktəbini bitirib (1966). 1965-78 illərdə Azərb. Opera və Balet Teatrının solisti olub. Onun ifası üçün plastiklik, güclü musiqi duyumu, virtuozluq səciyyəvi idi. O, “Nəsimi”, “Spartak”, “Qız qalası”, “Yeddi gözəl”, “İldırımlı yollarla”, “Məhəbbət əfsanəsi”, “Sonalar gölü”, “Yatmış gözəl” və s. baletlərdə əsas partiyaları ifa edib. Fransada, İtaliyada, İsveçdə, Danimarkada, Norveçdə, Hindistanda, Birmada, Nigeriyada, Seneqalda, Nepalda və s. ölkələrdə dəfələrlə çıxış edib.

oyk., sadə. Azərb. Resp. Göyçay r-nunun eyniadlı i.ə.v.-də kənd. R-n mərkəzindən 2 km c.-da, Şirvan düzündədir. Keçmiş adı Potubazar olmuşdur. Tədqiqatçıların ehtimalına görə, kəndin adı türk dillərindəki pot (bərə, keçid) və İran dillərində u (su) komponentlərindən düzəlib, “su üstündə keçid və ya bərə” mənasındadır. Yaşayış məntəqəsi Arvan çayının sahilində, bərə yaxınlığında yerləşdiyinə görə belə adlandırılmışdır. Azərb. dilinin dialektlərində “cavan camış” potu, türk dillərində isə “dəvə balası” potuk adlanır. Kəndin keçmiş adının Potubazar olması da keçmişdə burada mal bazarı olduğunu göstərir. Yaşayış məntəqəsi həmin bazarın ərazisində salındığından belə adlandırılmışdır.

Mənbə: ASE, 10 cilddə, VII cild, Bakı, 1983, s.615;

“Azərbaycan toponimlərinin ensiklopedik lüğəti”. II cild. Bakı, “Şərq-Qərb”, 2007, s.162.

Məscid Göyçay–Ucar magistralından k.-ə girən yolun 100 m-liyində yolun sağında yerləşir. Bu məscidin yaşı dəqiq məlum olmasa da, onun yaşının 150-dən çox olduğunu deyirlər. Alim Ə.Əlioğlunun “Göyçay – nəyi bilirik?” kitabında isə bu k.-də ilk məscidin 1960 ildə tikildiyi qeyd edilir. Məscidi Sədrəddin Əfəndi tikdirmişdir. Daha sonra Seyid Rza Axund və Məşədi Hacı Axund məscid tikdirmişdir. Amma hazırda olan bu məscidin bu iki məsciddən hansı olduğunu tam müəyyən etmək mümkün deyil. Kənd sakini Ə.Hacıyevin eşidib-bildiklərinə görə, bu məscidin 186 yaşı vardır. Məscid tikildiyi vaxtdan ta 1983-84 illərə qədər kirəmit örtüklü olmuşdur. Məsciddən 1930-50 ilə qədər məktəb, 1950-54 ilə qədər bağça kimi istifadə olunmuşdur. Kənd ağsaqqalı Əsəd kişinin dediklərinə görə: “1954 ildə atam həbsdən qayıtdıqdan sonra məscidin geri qaytarılması üçün xeyli mübarizə aparmış və buna nail olmuşdur. Məscid geri qaytarıldıqdan sonra təmizlədilmiş və o gündən bu günə kimi məscid kimi fəaliyyət göstərir”.