(23.1.1974, Göyçay r-nunun Ləkçıplaq k. – 26.1.1994, Füzuli r-nu ərazisində) – Birinci Qarabağ müharibəsi şəhidi.

Kənd orta məktəbini bitirərək Bakı ş. yerləşən 14 saylı Texniki Peşə Məktəbində qaynaqçı peşəsinə yiyələnib. 1992 ilin mayında hərbi xidmətə yollanıb. Çox keçmədən cəbhə bölgələrinə gedir. Qubadlı və Laçın uğrunda gedən döyüşlərdə iştirak edir. Qubadlının işğalından sonra Səxavət evə qayıdır. 1993 ilin oktyabrında o, yenidən Göyçay könüllülər batalyonuna qoşulur. Şükürbəyli Aşağı və Yuxarı Əbdürrəhmanlı, Kərimbəyli və digər kəndlər uğrunda gedən döyüşlərdə iştirak edir. 1994 ilin yanvarında Yuxarı Əbdürrəhmanlı kəndini almaq üçün 6 nəfər döyüşçü ilə birgə hücuma keçirlər. Lakin qüvvələr nisbətinin qeyri-bərabər olması səbəbindən əsgərlərimiz böyük tələfatla hücumu dayandırırlar. Səxavət bu döyüşdə ağır yaralanaraq şəhid oldu və 5 ay sonra – 1994 ilin mayında doğma kəndlərində dəfn olundu.

Mənbə: Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti Göyçay rayon şöbəsi.

(3.2.1967, Göyçay r-nunun Ləkçıplaq k. – 25.4.1994) – Birinci Qarabağ müharibəsi şəhidi.

İlk hərbi xidmətini 1985-87 illərdə Rusiyada keçib. Hərbi xidmətdən sonra bir müddət k.-də əmək fəaliyyətilə məşğul olub. Daha sonra erməni faşistlərə qarşı döyüşlərə yollanıb. 1994 ilin aprelində növbəti döyüşlərin birində şəhidlik zirvəsinə ucalıb. O, doğma kəndində torpağa tapşırılıb.

Mənbə: Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti Göyçay rayon şöbəsi.

(24.5.1929 – 26.6.2003, Göyçay r-nunun Çərəkə k.) – Azərb. SSR Dövlət mükafatı laureatı (26.4.1986), Rayon xalq deputatları Sovetinin deputatı (1977-78).

İlk təhsilini Çərəkə k. orta məktəbində alıb. 1950 il 6 oktyabr tarixində hərbi xidmətə yollanıb. 1953 ildə hərbi xidmət dövrünü başa vurduqdan sonra Göyçay r-nuna qayıdaraq M.Əzizbəyli adına kolxozda sıravi kolxozçu kimi çalışmağa başlayıb. 1963-68 illər ərzində kolxozda bağ briqadiri işləyib. 1968-74 illərdə su cuvarı, 1974-84 illərdə pambıqçılıq briqadiri, 1984-97 illərdə taxılçılıq briqadiri kimi fəaliyyət göstərib.

(1890, Tekirdağ vil.-nin (Türkiyə) Saray qəs. – 8.8.1984,  Göyçay r-nunun Cəyirli k.) – Nuru Paşanın komandanlığı altında Azərb.-na xilaskarlıq missiyası ilə gələn türk əsgəri.

Osman Dədəoğlu erməni daşnakları ilə döyüşdə yaralandığı üçün Azərb.-da qalır. Sonra sərhədlər bağlandığından Türkiyəyə qayıda bilmir. 1922 ildə, yəni sovet hakimiyyəti dövründə Osman Dədəoğlu türk əsgəri olması səbəbindən Sibirə sürgün edilir. 15 il sürgündən sonra yenidən Göyçaya gəlir və 1984 ilə qədər bu r-da yaşayır. Sürgündən öncə Göyçayın Cəyirli k.-də ailə quran Osman Dədəoğlunun bir oğlu, sürgündən sonra isə iki qızı olub. Osman baba Türkiyədə qalan qohumlarına dəfələrlə məktub yazıb. Amma onun ilk məktubu yalnız 1949 ildə Türkiyənin Tekirdağ vil.-nin Saray qəs.-nə çatır. O, məktubda Sovet İttifaqının tərkibində olan qardaş türk resp.-da – Azərb.-nın Göyçay r-nunun Cəyirli k.-də yaşadığını qeyd edir. 30 ildən sonra Osmanın sağ olmasını bilən qardaşı Hüseyn cavab məktubu yazır. Osman Dədəoğlu qohumları ilə 1975 ilə qədər məktublaşıb. Onun ölümündən sonra Göyçaydan Tekirdağa xeyli məktub yazılsa da, yalnız 20 ildən sonra bu məktubların birinə qardaşı oğlu Səbridən cavab gəlir. Göyçaya gələn Səbri əmisinin qəbrini ziyarət edir. Hazırda Osman Dədəoğlunun ailəsi və qohumları Cəyirli k.-də yaşayırlar.

Mənbə: https://www.facebook.com/Goychaytarixi/

(XVII əsrin ikinci yarısı, Göyçay r-nunun Xəlitli k. – XVIII əsrin birinci yarısı) – bu dövrdə ustadnamələri ilə şeir sənətini zənginləşdirən el şairi.

Atası dəllək olmuşdur. Murad da bu sənəti atası vasitəsilə öyrənmişdir. Ona görə də “Dəllək Murad” demişlər. Bu şəxsin həyatı və yaradıcılığı az öyrənilmiş, təkcə onun Şirvan diyarının Göyçay mahalının Xəlitli k.-də doğulduğu, k.-in bəyi ilə aralarındakı düşmənçilikdən k.-i birdəfəlik tərk etdiyi, Göyçay r-nunun Ləkçıraq k.-nə köçdüyü məlum olur. Ləkçıraq k.-də onun adını daşıyan məhəllə də vardır. Dəllək Murad aşıqlıq etməmişdir. Aşıq şeiri üslubunda yüksək sənət nümunələri yaratmışdır. Onun şeirləri daha çox nəsihətamiz səciyyəli olduğu üçün tezliklə yayılmış, aşıq məclislərinə ustadnamə kimi yol tapmışdır. Dastanların əvvəlində ustadnamə kimi onun şeirlərinə daha çox müraciət edilir. Əsasən ustadnamələri qalmış Dəllək Muradın adı bir neçə məhəbbət dastanımızın yazılı variantından oxucuya tanışdır.

(9.11.2001, Göyçay r-nunun Aşağı Qaraməryəm k. – 2.11.2020, Cəbrayıl) – Vətən müharibəsi şəhidi.

08.01.2020 il tarixdə həqiqi hərbi xidmətə çağırılmışdır. 2 noyabr 2020 il tarixdə Cəbrayıl istiqamətində gedən döyüşlərdə qəhrəmancasına şəhid olmuşdur. Ölümündən sonra Azərb. Resp. Prezidentinin sərəncamı ilə “Vətən uğrunda” (15.12.2020), “Cəsur döyüşçü” (24.06.2021), “Cəbrayılın azad olunmasına görə” (22.12.2020) və “Qubadlının azad olunmasına görə” (29.12.2020) medalları ilə təltif edilmişdir.

Əd.: http://goychay-ih.gov.az/index.html

(1913, Göyçay qəz. – 14.5.1942) – Böyük Vətən müharibəsi qəhrəmanı.

Göyçay RHK-dan оrduya çağırılıb. Sıravi əsgər. 45-ci zərbəçi atıcı briqadasında xidmət edib. Rusiya Federasiyası Leninqrad vilayətinin Zalutski r-nunun Bolşoye Streçho k.-də dəfn olunub.

Mənbə: Azərbaycan Respublikası Xatirə kitabı. 20 cilddə, III cild, Bakı, 2003, s. 86.

hidr., mür. İsmayıllı və Göyçay r-nları ərazisində çay. Çay dərəsi kolluq və bataqlıq olmuş, sonralar üstündə Aşağı Bayramlı su anbarı tikilmişdir. Suvarma məqsədilə suyu tamamilə anbara axıdılır. Vaxtilə karvan yolu ilə Qəbələ tərəflərə gedən dəvələrin burada batması çayın belə adlanmasına səbəb olmuşdur.

Əd.: “Azərbaycan toponimlərinin ensiklopedik lüğəti”. 1 cild, Bakı, “Şərq-Qərb”, 2007, s. 162

(8.12.1964, Göyçay r-nunun Ləkçıplaq k.) – tanınmış jurnalist, SSRİ Jurnalistlər İttifaqının üzvü (1990).

Azərb. Texniki Universitetini bitirib. Lakin gənc yaşlarından taleyini nəşriyyatla, mətbuatla bağlayıb. Ali məktəb illərində “Azərbaycan” nəşriyyatında adi işçidən sex rəisi vəzifəsinədək yüksəlib. Jurnalistika fəaliyyətini “Azərbaycan gəncləri”, “Savalan”, “Mozalan” qəzetlərində genişləndirib. 1991 ildə SSRİ Jurnalistlər İttifaqı nəzdində yeni açılmış Ümumittifaq Fotojurnalistika fakültəsinin ilk məzunlarından olub. Həmin vaxtlarda Bakıda “Azərbaycan gəncləri” qəzetində Azərb.-nın Milli Qəhrəmanı S.Əsgərova ilə eyni vaxtda jurnalistlik fəaliyyəti ilə məşğul olaraq erməni işğalçılarının iç üzünün və məkrli siyasətinin geniş ictimaiyyətə çatdırılmasında fəal iştirak edib. 1992 ildən Azərb. Dövlət Televiziyasında “7…17” musiqili verilişinin yaradıcısı olub. 1995 ildə verilişin önəmli uğurları verilişin müəllifinə şöhrət gətirdi. Həmin ilin noyabrında Rusiyanın paytaxtı Moskva ş.-də keçirilən “Uşaq və gənclərin televiziya verilişləri festivalı”nda “7…17” proqramı 1-ci yerə layiq görülüb. Azərb. teleməkanında ilk olaraq həmin gün veriliş bir nömrəli Ostankino kanalında nümayiş etdirilib və hər iki ölkənin mətbuatında geniş işıqlandırılıb.

Azərb. Resp. Göyçay r-nunun Aşağı Qaraməryəm i.ə.v.-də kənd. Rayon mərkəzindən c.-ş., Alxasava və İncə kəndlərin yaxınlığında, Yuxarı Şirvan kanalının sağ sahilində, Şirvan düzündə yerləşir.
Dövranlı oykonimi haqqında müxtəlif mülahizələr vardır. Bir çoxları toponimi dövran termini ilə əlaqələndirirlər. Bəziləri isə toponimi dövral, davral sözü ilə bağlayırlar. Qazax dialektində davar sözü “hündür, ucaboylu” mənasındadır.

Mənbə: https://az.m.wikipedia.org/wiki/D%C3%B6vranl%C4%B1