2005 ildə Göyçay ş.-də Heydər Əliyev Muzeyi tikilmiş və 2006 ildən fəaliyyətə başlamışdır. 2009 ildə isə Heydər Əliyev Mərkəzi tikilib. 12 fevral 2010 ildə Göyçayda səfərdə olan Azərb. Resp. Prezidenti İlham Əliyevin iştirakı ilə Heydər Əliyev Mərkəzinin rəsmi açılışı olub. AR mədəniyyət və turizm nazirinin 24.1.2012 il tarixli, 19 saylı əmrinə əsasən, Heydər Əliyev Muzeyi ilə Heydər Əliyev Mərkəzi birləşdirilərək, Heydər Əliyev Mərkəzi adlandırılıb, muzeyin eksponatları mərkəzə köçürülüb.
Mərkəz iki mərtəbədən ibarət olub, sahəsi 2150 kv.m-dir. Mərkəzdə 310 yerlik iclas zalı, 20 nəfərlik konfrans zalı, 12 inzibati otaq, kitabxana və yardımçı otaqlar, həmçinin sahəsi 466 kv.m olan ekspozisiya zalı mövcuddur. Mərkəzin ümumi fondunda 535 eksponat var. Ekspozisiya zalında yerləşən eksponatların sayı 64, ekspozisiya zalından kənarda yerləşən eksponatların sayı 24 ədəddir. Mərkəzin ikinci mərtəbəsində Ulu Öndərin görkəmli ədəbiyyat və incəsənət xadimləri ilə görüşlərini əks etdirən 36 ədəd eksponat yerləşir.
Mərkəzdə Ümummilli lider Heydər Əliyevin həyat və siyasi fəaliyyətini əhatə edən eksponatlar 6 bölmədə yerləşdirilib. Birinci bölmədə Ulu Öndərin uşaqlıq, gənclik və tələbəlik illəri yer alıb. İkinci bölmə Heydər Əliyevin dövlət təhlükəsizlik orqanlarında çalışdığı dövrü əhatə edir. Üçüncü bölmə isə Heydər Əliyevin 1969 ildən Azərb. rəhbərlik etdiyi dövrü əks etdirir. Dördüncü bölmədə Heydər Əliyevin Göyçaya səfəri yer alıb. Beşinci bölmədə Heydər Əliyevin 1982-92 illərdəki fəaliyyətini əks etdirən eksponatlar nümayiş etdirilir. Altıncı bölmədə isə Heydər Əliyevin hakimiyyətdə olduğu ikinci dövrü – müstəqil Azərb. Resp. rəhbərlik etdiyi illəri (1993–2003) əks etdirən eksponatlar yer alıb.
Heydər Əliyev Mərkəzində 16 nəfər çalışır. Bunlardan 4 nəfəri inzibati, 12 nəfəri isə texniki işçidir.
Mərkəzin ilk direktoru Z.Əliyeva olub. O, 2007 ildən Heydər Əliyev Muzeyinin, 2012 ildən isə Heydər Əliyev Mərkəzinin direktoru olub və 2020 ilə kimi həmin vəzifədə çalışıb. 2020 ildən Heydər Əliyev Mərkəzinin direktoru Vəliyeva Samirə Məhəmməd qızıdır.
Məlumat A.Məmməddən alınıb.
