Kərimov Cavad Mirəliəkbər oğlu (25.9.1943, Masallı r-nunun Qızılavar k. – 2006) – din xadimi. C.Kərimov 25.9.1943 ildə Masallı r-nunun Qızılavar k-nin “Dəlləkoba” (keçmiş Seyyidoba) məhəlləsində, ruhani ailəsində dünyaya göz açmışdır. Ulu babaları Lerik r-nunun Camanşeh k.-nin Seyyidlərindən olmuşdur, lakin repressiya zamanı Qızılavar k-nə köçürülmüşlər. Valideynləri – islam dini üzrə alim Kazımov Mirəliəkbər və Seyyidə Fizzə xanım Haşimilər nəslinə mənsub olmuşlar. İlk təhsilini “Dəlləkoba” ibtidai məktəbində almışdır. Ruhani elminə dərindən yiyələnməyi qarşısına məqsəd qoymuş və görkəmli alimlər olan molla Hüseyn Əli, molla Əli Fəttah, molla Şeyx Qüdrət, molla Əli Nağı, molla Cəbrayıl (qayınatası), repressiya qurbanı olmuş şeyx Hüseyn kimi şəxsiyyətlərdən fiqh, üsul və şəriət elmlərinə yiyələnmişdir.

28.6.1978 ildə mərhum Şeyxülislam Hacı Qəzənfər tərəfindən Göyçay r-nuna axund təyin edilmişdir. Keçmiş sovetlər imperiyası dövründə islam dininin kəskin şəkildə təqib olunduğu vaxtlarda – 1984 ildə Sovet İttifaqından Məkkəyə ziyarətə gedən 14 nəfər zəvarrın tərkibinə Axund Mircavad ağa da daxil olmuş və müqəddəs məkanı ziyarət etmək şərəfinə nail olmuşdur. Son illərdə Ağanın İlahi şeirləri və “Ürək yanğısı” kitabı çap olunub. Axund kimi dərin hörmət və nüfuz qazanmış, İslam həqiqətlərinin, mədəniyyətinin, əxlaqının xalqa çatdırılmasında gərgin əmək sərf etmiş Hacı Mircavad ağa 2006 ildə vəfat etmişdir.

Mənbə: İ.Musayev. “Göyçay rayonundakı dini abidələr və tarixi şəxsiyyətlər”, Bakı, İpəkyolu, 2014, s. 87-89.