Qacarlar sülaləsinin ziyalı şahzadəsi, Abbas Mirzə Naibüssəltənənin oğlu Fərhad Mirzə Mötəmədüddövlə 1875-76 illərdə baş tutmuş Məkkə ziyarəti zamanı Azərbaycanın, o cümlədən Şirvanın bir sıra bölgələrindən də keçir. Bu ziyarətə həsr etdiyi “Səfərnamə” əsərində Fərhad Mirzə Göyçaydan keçdiyi epizodu belə təsvir edir: “21 ramazanül-mübarək, (22 oktyabr 1875) cümə günü Göyçaya gəldik. Kəndin (Göyçayın) qərbində Göyçay çayı axır və şimaldan cənuba istiqamətlənmişdir.

Qara Məryəmdən ta Göyçayadək olan məsafə on iki verst iki çetvərdir. Qaraməryəm poçt məntəqəsinə çatmamış, yolun sağ tərəfində, yaxın məsafədə, bağlarla əhatə olunmuş Yekəxana kəndidir. Kənd əhalisinin yarısı şiəməzhəb, yarısı isə sünniməzhəbdir.

Bir başqa kənd uzaqda dağın ətəyində yerləşən Qarayazı kəndidir, bağlı-bağatlıdır. Oranın əhalisi tamamilə şiəməzhəbdir. Kəndin mollası Molla Hüseyn şiələrlə birlikdə bizi istiqbala gəldilər.

Qaraməryəmin yarısı malakandır və Malakan tayfası ruslardan ibarətdir. Onların keşişləri yoxdur və malakanlar rus məzhəbinə xilafdırlar. Qaraməryəmdən on yeddi verst keçdikdən sonra yolun sol tərəfində əvvəlcə Qarabaqqal kəndinin bağları görünür. Bu kənd böyük kənddir. Kəndin aşağısında isə Bəğər (Bığır) kəndidir. Hər iki kəndin arasında bir verst məsafə vardır. Lakin sanki bu kəndlər uzaqdan fasiləsiz uzanan bağlardır. Bu iki kəndin bağlarının uzunluğu səkkiz verstdir.

Göyçayın (çay nəzərdə tutulur) suyu çox yaxşıdır. Bu sular Qəbələ və Şahdağdan gəlir. Bu dağlar Dağıstan dağlarının davamıdır. Biz çayı keçərək mənzilə yetişdik. Eşitdik ki, əlahəzrət imperator Göyçay kəndini şəhər etmək fikrindədir. İndi burada xeyli yaxşı evlər tikilmişdir, bazarı vardır.

Naçalnik bizi bir neçə otaqdan ibarət olan, özünün yaşadığı binada yerləşdirdi. Otaqlarla üzbəüzdə çay axır. Çaparxanaya qədər bir az məsafə vardır.

İndi burada xəzan fəslidir. Ona görə də əlli səngə qədər (İranda su ölçü vahididir) su vardır”.

Mənbə: Fərhad Mirzə Qacar. “Səfərnamə”. Bakı, “Elm və təhsil”, 2017, s.46.