(XIX əsrin sonu XX əsrin əvvəlləri) – din xadimləri.
Hacı Qiyas Əfəndi və Hacı Zakir Əfəndi XIX əsrin sonu XX əsrin əvvəllərində yaşamış İslam alimlərindəndilər. Soyu Əfəndilər nəslinə mənsub olan Hacı Qiyas və Hacı Zakir Əfəndinin atası Rəsul Əfəndi, babası isə Əfəndi baba adı ilə tanınmış Məhəmməd Əfəndi olmuşdur. Hacı Qiyas və Hacı Zakir Əfəndi öz dövrünə görə tanınmış insanlardan olmuşlar. Dövrünün açıq gözlü alimi kimi tanınan Hacı Qiyas və Hacı Zakir Əfəndi haqqında çoxlu məlumat toplamaq istəsək də, istəyimizə nail ola bilmədik. Kənd sakini Rəşad Əfəndi bizlərə Hacı Qiyas Əfəndinin harada təhsil aldığı haqqında bir az məlumat verdi. Onun dediklərinə görə, Hacı Qiyas Əfəndi Türkiyədə İstanbul Universitetində oxumuşdur. Sözlərini qüvvətləndirərək o, Qiyas Əfəndinin hüsnü xəttinin bu gündə İstanbul Universitetində qorunub-saxlandığını qeyd etdi.
Bu məlumatlarla yetinməyib Hacı Qiyas Əfəndinin qəbrini ziyarət etdik. H.1332 ildə vəfat edən Hacı Qiyas Əfəndinin baş daşının üzərinə “Allahdan alim olan qullarından olanlar qorxar” ayəsi və “Alimlər Peyğəmbərlərin varisləridir” hədisi yazılmışdır. Bu ayə və hədis onun böyük İslam alimi olduğuna dəlalət edir.
Hacı Zakir Əfəndinin özünəməxsus iki əlyazma əsəri vardır. Bu əlyazmalar Hacı Ruslan Məmmədovun şəxsi kitabxanasında saxlanılır. Onun h. 1309 ildə İbn Hişamın Qavaidul-İrab kitabının öz hüsnü xətt ilə yazdığı əlyazması vardır. Bu əlyazma Nəsx xətti ilə yazılmışdır. 212 səhifə həcmində olan bu əlyazmanın ölçüsü 18×22.5 sm-dir.Bundan başqa Hacı Zakir Əfəndinin h.1298 ildə Mövsilinin Kitabul-İxtiyarın şərhinin əlyazması bu gün salamat qalmaqdadır. Riqa xətti ilə yazılmış bu əlyazma 250 s. həcmindədir. Bu əlyazmanın ölçüsü 17×22.5 sm-dir.
Mənbə: İ.Musayev. “Göyçay rayonundaki dini abidələr və tarixi şəxsiyyətlər”, Bakı, İpəkyolu, 2014, s. 96-97
