(4.2.1991, Göyçay r-nunun Çayarxı k. – 25.10.2020, Füzuli r-nu) – Vətən müharibəsi şəhidi.
1997–2006 illərdə Çayarxı k. ümumi orta məktəbində 9 illik təhsil aldıqdan sonra rayondakı 106 saylı Peşə Məktəbinə daxil olub.
Əsgərliyini 2009-10 illərdə N saylı hərbi hissənin tank taborunda keçirmişdir. Evə gələrkən nümunəvi xidmətinə görə komandanlığın ona yazdığı Fəxri fərmanları, tərifnamələri də özü ilə gətirmişdi. Əsgəri xidmətdən qayıtdıqdan sonra isə Aznar zavodunda traktorçu işləyib.
29 sentyabr 2020 il tarixdə qismən səfərbərlik üzrə hərbi xidmətə cəlb edilmiş, 25 oktyabr 2020 il tarixdə Füzuli-Cəbrayıl istiqamətində gedən döyüşlərdə qəhrəmancasına şəhid olmuşdur. Doğulduğu kənddə dəfn edilib.
Ölümündən sonra Azərbaycan Respublikası Prezidentinin sərəncamı ilə “Vətən uğrunda” (15.12.2020), “Cəbrayılın azad olunmasına görə” (24.12.2020), “Füzulinin azad olunmasına görə” (25.12.2020) və “Cəsur döyüşçü” (24.6.2021) medalları ilə təltif edilmişdir.
