(Göyçay r-n MKS). Göyçay ş. ən iri kütləvi dövlət kitabxanası. Göyçayda ilk kitabxana 1923 ildə təşkil olunub. Həmin kitabxana dükan damlarının birində yerləşir və o zamanlar Sovet dövründə yeni mədəni intibahın bir tələbi və zəruri ünsürü kimi ş.-də diqqəti cəlb edirdi. Bütün qəzada bu, yeganə kitabxana idi. Həmin kitabxana dövrün partiya, sovet təşkilatlarının ş. və k. ziyalılarının, müəllimlərin təşəbbüsü ilə yaradılmışdı. Kitabxananın müdiri Allahverdi Namazov idi. Dövrün müəllim-ziyalılarından Qafur Əfəndiyev, Ağamusa Musayev, Məmməd Məmmədov, Abdulkərim Əfəndiyev, Ağəli Kərimov (Ağəli Əfəndi), Əli Səmədov, Haşım Haşımov, Ziyad Xəlilov, İsmayıl Əfəndiyev kitabxana ilə əlaqə saxlayar, kitab hədiyyə edərdilər. Gənclərdən Mehdi Quliyev və Rəsul Rza kitabxanada işləyirdi. Bundan başqa uzun illər kitabxanaya Naibə Maqsudova (Maqsud Maqsudovun qızı) müdirlik edib.

1969 ildə kitabxanada 28057 ədəd kitab, 3870 nəfər isə oxucu olub. R-nda 1960 ilədək 29 k.-də kitabxana fəaliyyət göstərib. İndi 59 k.-də kitabxana var.

1950 illərin sonlarında kitabxana indiki Diş Poliklinikasının yerində, sonra indiki Uşaq–Gənclər İdman məktəbinin yerləşdiyi binada olub, bir vaxtlar isə Mədəniyyət evinin II mərtəbəsində yerləşib. Sonralar kitabxana indiki ikimərtəbəli ünvanına köçürülüb. 

1975 ildən kitabxana mərkəzləşdirmə işini həyata keçirir. Hazırda Mərkəzi Kitabxana M.Ə.Sabirin adını daşıyır. Göyçay r-n MKS-nin tərkibində 1 mərkəzi, 3 şəhər kitabxana filialı, 33 kənd kitabxanası olmaqla 37 kitabxana və kitabxana filialı fəaliyyət göstərir. Göyçay r-n MKS fondunda 312442 çap nüsxəsi kitab saxlanır.

Əd.: 1.Azərbaycan Kitabxana Ensiklopediyası, M.F. Axundov adına Milli Kitabxana, Bakı, 2015, s.247

2. http://goychay.cls.az