Bu k-in tarixi çox da qədim deyildir. Kənd sakini 90 yaşlı Məmməd Ağa oğlu ilə söhbət etdiyimiz zaman o, k-in dini tarixi haqqında bildiklərini bu cür dilə gətirdi. Bu k-də ilk məscid 1923 ildə kənd camaatının topladığı vəsait hesabına tikilmişdir. Məscid 1945 ilə qədər fəaliyyət göstərib. Məscid k-in yuxarı hissəsində yerləşirdi. Bu k-də vaxtilə çox savadlı din xadimləri mollalıq etmişdir. 1923 ildən təxminən 1944-45 illərə qədər Molla Məhəmməd, 1948 ildən 1980 ilə qədər Dadaş baba, 80 illərdən bir neçə il əvvələ qədər Şəfi baba mollalıq etmiş, insanlara öz dinlərini düzgün şəkildə çatdırılması üçün çox böyük əziyyət çəkmişdirlər. Sözlərini qüvvətlədirərək, Məmməd Ağa oğlu dedi ki, bu kənddə öz dövrünə görə çox böyük kəramət sahibi övliyalar da olmuşdur. Onlardan Qəfər baba, Şıxmahmud baba insanlar arasında sevilib-seçilmiş insanlardır. Sonralar Şıxmahmud baba Şamaxıda məskunlaşmışdır. Hal–hazırda Şamaxı r-nunda onun qəbri insanların ziyarət yerlərindən biridir. Böyük kəramət sahibi olan Qəfər baba insanlar arasında ofsunçu kimi tanınsa da, o şəxsiyyət insanların yaddaşında dərin izlər buraxmışdır.

Xalq arasında yayğın olan rəvayətə görə, Qəfər baba insanlara zərər vermək üçün gələn ilanları tutub apardığını söyləyirlər. Bu gün Mallı Şıxlı k-nin camaatı Qəfər babanın ocağını ziyarət edir, onun adını daim anırlar.

Hal-hazırda k-də yeni bir məscid fəaliyyət göstərir. K-in mərkəzinə yaxın, k. yolunun sol tərəfində yerləşir. Bu məscid Əbu Məhcəl məscidi adlanır. Məscid ərəb qadını Aişə adlı bir xanımın verdiyi zəkat pulu hesabına İslam İrsinin Dirçəliş Cəmiyyəti tərəfindən 1996 ildə tikilmişdir.

Məscid binası kiçik ölçüdədir. İbadət zalı (6 m x 12 m) 72 kv.m-dir. Bu zalın ş. və q. tərəfdə 3 pəncərə olmaqla 6 pəncərəsi, zala daxil olmaq üçün 2 qapısı vardır. Qapılar şm. tərəfdəndir. Giriş qapıları önündə 2 m enində məscid eni boyu uzanan eyvan vardır. Eyvanı 5 ədəd bir-birinə bağlanmış tağlı sütun bəzəyir. Minarəsi damın üzərində səkkizguşəli, yuxarısı sivri uclu olub 2 m hün.-dədir. Məscidin damı və minarə ağ dəmir təbəqə ilə işlənmişdir. Məscidin inşasında yerli inşaat materiallarından istifadə olunmuş, bina başdan-başa mişar daşı ilə tikilmişdir.

Mənbə: İ.Musayev. “Göyçay rayonundaki dini abidələr və tarixi şəxsiyyətlər”, Bakı, İpəkyolu, 2014, s. 59-60