“Nar bayramı” ilk dəfə Azərb. Resp. Mədəniyyət və Turizm Nazirliyi və Göyçay r-n İcra Hakimiyyətinin birgə təşəbbüsü ilə 3 noyabr 2006 ildən başlayaraq mütəmadi olaraq keçirilir.
Tədbirdə bir sıra xarici ölkə səfirləri, habelə respublikadan kənarda yaşayan göyçaylı iş adamları da iştirak edirlər. Tədbir iştirakçıları şəhərin mərkəzi meydanında nar məhsullarından hazırlanmış şirələrə qonaq edilirlər.
Nar bayramında Göyçay r-nun ayrı-ayrı kəndlərində yetişən nar növləri və onlardan hazırlanmış məhsullar r-n mərkəzinə gətirilir və şəhər meydanında təşkil olunmuş sərgidə nümayiş etdirilir. Şəhər mərkəzində gənc idmançıların çıxışları və konsert proqramlarına tamaşa edilir.
Bayramların keçirilməsində əsas məqsəd regionların təbliği, mədəni və iqtisadi potensialın nümayişi və turizmin inkişaf etdirilməsindən ibarətdir.
Azərb. tarixi uzaq əsrlərə gedib çıxan narın yetişdirilməsi mədəniyyəti ilə qırılmaz surәtdә bağlıdır. Narlar tarixən Azərb.-ın, demәk olar, bütün regionlarında yetişdirilir. Lakin quru subtropik zonada yerləşən Şirvan ən yaxşı nar sortlarının yetişdirilmәsi mərkəzi kimi qəbul edilmişdir. Şirə istehsalı üçün əsas etibarilə Göyçay r-nunda yetişən narlardan istifadə olunur.
Məhz Göyçay narı dünyada tanınaraq, “əsl Azərbaycan narı” üçün sinonimə çevrilmişdir. Göyçay narlarının əla dadı və dəyişməz keyfiyyətinin sirri dünyanın heç bir yerində rast gəlinməyən unikal mikroiqlimin mövcudluğu və rayonun torpaq tərkibidir.
Mənbə: Göyçay rayon Heydər Əliyev Mərkəzi
