(5.4.1946, Göyçay ş.) – rabitə sahəsi üzrə tanınmış ekspert, Azərbaycan Respublikasının sabiq rabitə naziri (1992), texnika elmləri namizədi (1981).
Azərbaycan Politexnik İnstitutunu (indiki Azərbaycan Texniki Universiteti) telekommunikasiya mühəndisi ixtisası üzrə bitirib. 1972 ildən Azərb.Resp. Rabitə Nazirliyi sistemində elmi-texniki informasiya mühəndisi, Nazirliyin texniki şöbəsində böyük mühəndis, 1973 ildən isə Nazirliyin Şəhər Telefon Şəbəkəsi şöbəsinin rəisi vəzifələrində çalışıb. 1974-77 illərdə Leninqrad Elektrotexniki Rabitə İnstitutunun aspiranturasında təhsil alıb.
1977 ilin iyul ayında Bakı Rabitə Elektrik Texnikumuna şöbə müdiri göndərilib. 1978 ildə Azərb. Politexnik İnstitutunun “Elektrik rabitəsi” kafedrasına assistent qəbul olunub. 1981 ildə Azərb. Təhsil Nazirliyi xəttilə Böyük Britaniyanın Birminhem şəhərindəki Aston Universitetində bir illik elmi təcrübə keçib. 1983 ildə Azərbaycan Politexnik İnstitutunun “Elektrik rabitəsi” kafedrasının dosenti seçilib, həmin il Birləşmiş Millətlər Təşkilatının Beynəlxalq Telekommunikasiya İttifaqının eksperti təsdiq olunub. 1985-86 illərdə bu vəzifədə Əfqanıstan telekommunikasiyasının inkişaf layihəsində iştirak edib. 1992-93 illərdə BMT eksperti kimi Liviyanın və Pakistanın inkişaf layihələrində iştirak edib. 2002 ildə Azərb. İKT-nın İnkişaf Strategiyası Layihəsi üzrə milli ekspert seçilib. Həmin ilin sentyabrından AMEA Kibernetika İnstitutunda (indiki İdarəetmə sistemləri İnstitutu) aparıcı elmi işçi vəzifəsində çalışıb. 100-dən artıq elmi əsərin, 10 metodik göstərişin, 5 dərs vəsaitinin, 7 monoqrafiyanın müəllifidir. Hazırda təqaüddədir.
Əd.: V.Abdullayev, R.Quliyev. Çinarlı yurdun övladları (əlyazması hüququnda), s.16-17.
