(7.01.1974, Göyçay ş.-23.11.2020, Tərtər-nunun Suqovuşan qəs.) – AR Silahlı qüvvələrinin polkovniki, AR Silahlı qüvvələrinin Birinci Ordu Korpusunun komandir müavini – Vətən Müharibəsinin şəhidi.
Səmidli 2020 ilin sentyabr ayında başlayan Vətən Müharibəsində Tərtər r-nunun Suqovuşan qəs., Talış k. ətrafındakı bir neçə əlverişli yüksəkliyin və Murov yüksəkliyinin işğaldan azad edilməsi uğrunda gedən döyüşləri idarə edənlərdən biri olmuşdur.
Səmidli 1980 ildə Göyçay ş. 6 saylı orta məktəbə daxil olmuş və 1991 ildə həmin orta məktəbi bitirmişdir. 1993 ildə Türkiyə Resp. Ankara ş.-də yerləşən Quru Qoşunları Ali Hərbi Məktəbinə daxil olub və 1997 il 30 avqust tarixində oradan motoatıcı ixtisası üzrə məzun olmuşdur. 1997 ilin sentyabr-1998 il may ayına qədər İstanbulda yerləşən Tuzla Piyadə məktəbində zabit ixtisaslaşma kursunda təhsil almışdır. 1998 ilin avqust ayına qədər Türkiyə Quru Qoşunlarının Birinci Ordusunun N saylı briqadasında motoatıcı taqım komandiri vəzəfəsində təcrübə keçmişdir. 1998 ilin sentyabr ayından AR Silahlı Qüvvələrinin H. Z. Tağıyev qəsəbəsində yerləşən N saylı hərbi hissəsində motoatıcı taqım komandiri vəzifəsinə təyin olunmuşdur. Hərbi hissədə xidmət etdiyi müddətdə fərqləndiyi üçün 2000 ildə H.Əliyev adına Ali Hərbi Məkətəbə taqım komandiri vəzifəsinə təyin olunmuşdur. 2003 ilə qədər Ali Hərbi Məktəbdə taqım və bölük komandiri olaraq xidmət etmiş və Azərb.-da gələcək zabitlərin hazırlanmasına öz töhfəsini vermişdir. 2003 ildən Tovuz r-nunda düşmənlə təmas xəttində yerləşən N saylı hərbi hissədə bölük komandiri olaraq xidmətə davam etmişdir. Düşmənlə ön xətdə yerləşən strateji yüksəklikdə bölük komandiri olaraq, xidmət etdiyi müddət ərzində nümunəvi xidmət etmiş və düşmən atəşkəsi pozduğu zamanlarda ona layiqli cavab vermişdir. 2004 ilin sonlarında Tovuz rayonunda N saylı hərbi hissədə ön xətdə yerləşən taborda tabor komandirinin maddi-texniki təminat üzrə müavini vəzifəsinə təyin edilmişdir. 2005 ildə Almaniya Resp. “Corc Marşal” adına Avropa Təhlükəsizlik Mərkəzində kurs keçmişdir. 2005 ildə Hərbi Polisin xüsusi təyinatlı taborunda komandir müavini vəzifəsinə təyin olunmuşdur. 2007 ildə Hərbi Polisin qərargahında xidmət etmişdir. 2007 ildən 2010 ilə qədər Lənkəran r-n Hərbi Polisinin rəisi vəzifəsində xidmət etmişdir. 2010 ildə Füzuli r-nunda dislokasiya olan N saylı hərbi hisənin ön xətt taboruna tabor komandiri vəzifəsinə təyin olunmuşdur. Cəlilabad r-nunda yerləşən N saylı hərbi hissəyə tabor komandiri təyin olunmuş və bir müddət sonra eyni hərbi hissədə əməliyyat bölmə rəisi və qərargah rəisi vəzifələrində xidmət etmişdir. 2015 ildə Birinci Ordu Korpusunda korpusun əməliyyat bölmə rəisi vəzifəsinə təyin olunmuşdur. Daha sonra Birinci Ordu Korpusunda maddi texniki təminat bölməsinin baş zabiti olaraq xidmət etmişdir. 2016 ildə aprel döyüşlərində Talış k. istiqamətində döyüşlərdə əməliyyat rəhbəri olaraq iştirak etmişdir. Bu döyüşlər zamanı sağ dizindən qəlpə yarası alaraq, qazi olmuş və cərrahi əməliyyata məruz qalmışdır. 2017 ildə Birinci Ordu Korpusu komandirinin tərbiyəvi işlər üzrə müavini vəzifəsinə təyin edilib.
27 sentyabr 2020 il tarixində işğal edilmiş torpaqlarımızın azad olunması üçün Vətən müharibəsi başladıqda ön xətdə döyüş tapşırıqlarının yerinə yetirilməsində birbaşa iştirak etmişdir. Talış k.-nin və Suqovuşanın azad edilməsində iştirak etmiş və fədakarlıqla öz borcunu yerinə yetirmişdir və qəhramancasına savaşmışdır. Daima ön xətdə olaraq şəxsi heyəti ruhlandırmış və onlarla bərabər döyüşə qatılmışdır. Döyüş zamanı dəfələrlə həyatını təhlükəyə ataraq 30 nəfərədən artıq yaralını döyüş meydanından çıxararaq həyatını xilas etmişdir. Ümumi qələbəyə böyük töhfə vermişdir. 10 noyabr tarixində Qələbə sevincini yaşasa da düşmən nəzarətində olan ərazilərdə şəhidlərimizin nəşinin qalması onu çox narahat edirdi və 23 noyabr tarixində şəhidlərimizin nəşini almaq üçün danışıqlar apararkən, Suqovuşanda minaya düşərək şəhid olmuşdur.
Beynəlxalq Qızıl Xaç Komitəsi, Rusiya sülhməramlıları və Ermənistan tərəfinin rəsmilərindən ibarət qrupun üzvü olub. Polkovnik Səmidli şəhid olaraq, noyabrın 24-də Göyçay ş. Şəhidlər Xiyabanında dəfn olunmuşdur. Polkovnik Səmidli 25 ildən artıq xidməti müddətində hər bir vəzifədə hərbi biliyi, intizamı, bacarığı, nümunəvi xidməti və Vətənə olan sevgisi ilə fərqlənmişdir.
Xidməti dövründə müxtəlif medal və ordenlerlə təltif olunub: “Azərbaycan Silahlı Qüvvələrinin 10 illiyi” yubiley medalı (26.06.2001), “Qüsursuz xidmətə görə” 3-cü dərəcəli medalı (26.06.2002), “Qüsursuz xidmətə görə” 2-ci dərəcəli medalı (26.06.2007), “Azərbaycan Silahlı Qüvvələrinin 90 illiyi” yubiley medalı (26.06.2008), “Qüsursuz xidmətə görə” 1-ci dərəcəli medalı (26.06.2012), “Azərbaycan Silahlı Qüvvələrinin 95 illiyi” yubiley medalı (26.06.2013), “Hərbi xidmətdə fərqlənməyə görə” 3-cü dərəcəli medalı (20.04.2016), “Azərbaycan Silahlı Qüvvələri Veteranı” medalı (26.06.2017), “Hərbi xidmətlərə görə” medalı (25.06.2018), “Azərbaycan Ordusunun 100 illiyi” yubiley medalı (26.06.2018), “Azərbaycan Xalq Cümhuriyyətinin 100 illiyi” yubiley medalı (28.05.2019).
Ölümündən sonra Azərb.Resp. Prezidentinin sərəncamı ilə “Zəfər” ordeni (09.12.2020), “Vətən uğrunda” (15.12.2020), “Suqovuşanın azad olunmasına görə” (29.12.2020) medalları ilə təltif edilmişdir.
Şəhid polkovnik Səmidlinin döyüşdən əvvəl şəxsi heyət qarşısında çıxış edərkən dediyi “Bir canımız var. Ya qalib, ya qazi, ya da şəhid olaq! Bizim başqa seçimimiz ola bilməz!”sözü hərb tariximizə qızıl hərflərlə yazılmışdır və bu sözləri hər zaman yadımızdadır: Özü isə dediyi kimi, həm qazi, həm qalib, həm də şəhid oldu.
Məlumat B.Səmidlinin atasından alınmışdır.
