(9.5.1925, Göyçay ş.- 25.2.2012, Bakı ş.) – alim, geoloq-neftçi, professor, geologiya-mineralogiya elmləri doktoru (1977), Azərb. Resp. əməkdar geoloqu (1982), prezident təqaüdçüsü (19.09.2006). Xəzər dənizinin akvatoriyasının neft və qazkondensat yataqlarının kəşfində bilavasitə iştirak etmişdir.
Orta məktəbi bitirdikdən sonra 1943 ilin iyun ayında könüllü şəkildə müharibəyə yollanıb. O, 77 diviziyanın tərkibində Melitopoldan Dnepr çayına kimi döyüşlərdə iştirak edib. 1943 ilin 23 dekabrında güllə yarası almış və 1944 ilin yanvarın 6-na kimi hərbi hospitalda müalicə olunmuşdur. Hospitaldan çıxandan sonra tank məktəbində oxumuş, 1 Belarus cəbhəsinin tərkibində döyüşlərə qatılmış, Minskdən Varşavaya qədər döyüşçü-tankçı yolunu keçmişdir.
Müharibədən sonra N. Xəlilov Bakıya qayıtmış və M. Əzizbəyov adına Azərbaycan Neft və kimya İnstitutunda geologiya mühəndisi ixtisası üzrə təhsil alıb (1951 ildə bitirərək, geoloq mühəndis ixtisası almışdır. 1951 ildən 30 il ərzində N. Xəlilov Gürgən və Primorsk qazma kəşfiyyat idarəsində işləyib. 1961-62 illərdə onun elmi işləri müxtəlif jurnallarda çap olunur. Bu məqalələrdə olan elmi nəticələr N.Xəlilovun dissertasiyasının əsasını təşkil etmişdir. 1962 ildə onun “Geoloji quruluş və Abşeron arxipelaqının şimal qərb hissəsinin neft və qaz hasilatının perspektivləri” mövzususnda elmi işi geologiya-minerologiya elmləri namizədi alimlik dərəcəsinə təqdim olunur. N.Xəlilov Kalin svitasında neft və qaz yataqlarının axtarışlarını antiklinal qatların daha dərinliyə salınmış hissələr həddində həyata keçirməyi tövsiyə etmişdir. Nəticədə bu qazılmış buruqlar sənaye miqyaslı qazla fontan vurdular. 1974 ildə N.Xəlilov “Bakı arxipelaqının geoloji quruluşu və anomal yüksək qatlar təzyiqi şəraitində neft və qaz axtarış-kəşfiyyat işlərinin effektiv artmasının yolları” mövzusunda doktorluq dissertasiyası müdafiə etmişdir. Alim bu işdə buruqların qurulması prosesində yaranmış quruluş çətinliklərinin səbəblərini ətraflı xarakterizə etmişdir. Bu tədqiqatların sayəsində qazma texnologiyası, gilli məhlullarda kimyəvi reagentlərin tətbiq edilməsi, müxtəlif stratiqrafik səviyyələrdə xüsusi çəkinin nizama salınması üzrə konkret tövsiyələr hazırlamaq mümkün olmuşdur. 1979-2006 illərdə “Qiprodənizneftqaz” Dövlət elmi tədqiqat neft qaz layihə institutunda “Dəniz neft və qaz yataqlarının geologiyası və kəşfiyyatı” laboratoriyasının müdiri işləmişdir. Nüsrət Xəlilov “Abşeron bankası”, “Qum-dəniz”, “Sanqaçal-dəniz” və s. neft və qaz yataqlarının kəşfində və istismarında fəal iştirak edir. O, Amerika Neftçi geoloqlar assosiasiyası Azərbaycan Bölməsinin prezidenti seçilir. Eyni zamanda elmi kadrların hazırlanmasında fəal iştirak edən N.Xəlilov 2000-ci ilin may ayında Moskva şəhərində, Beynəlxalq tərcümeyi-hal mərkəzi tərəfindən nəşr edilmiş “XX əsrin əsgərləri”, Böyük Vətən Müharibəsi Veteranı kimi adı tarixi kitaba salınır. Nüsrət Xəlilov birçox dövlət və ictimai orden və mükafatlarla təltif edilib. 2010 ildə N.Xəlilov elmin və təhsilin inkişafında görkəmli xidmətlərinə görə Elmi Əməkdaşlıq üzrə Beynəlxalq Təşkilatın (WOSCO) (London) Qızıl medalı ilə təltif olunub.
Mənbə: V.Abdullayev, R.Quliyev. Çinarlı yurdun övladları (əlyazması hüququnda). s.8-9;
Nüsrət Xəlilov // az.m.wikipedi.org;
