(24.12.1961, Bakı ş.) – Azərbaycanın görkəmli dövlət xadimi, Azərbaycan Respublikasının Prezidenti.
1967-77 illərdə Bakı ş.-də 6 saylı orta məktəbdə təhsil alıb. 1977-82 illərdə Moskva Dövlət Beynəlxalq Münasibətlər İnstitutunda (MDBMİ) təhsil alıb. MDBMİ-ni bitirdikdən sonra, 1982 ildə həmin institutun aspiranturasına daxil olub. 1985 ildə dissertasiya müdafiə edərək tarix elmləri namizədi elmi dərəcəsini alıb və 1985-90 illərdə Moskva Dövlət Beynəlxalq Münasibətlər İnstitutunun müəllimi olub. 1991-94 illər ərzində özəl biznes sahəsində çalışıb və bir sıra istehsal-kommersiya müəssisələrinə rəhbərlik edib.
1994-2003 ilin avqust ayınadək Azərbaycan Respublikası Dövlət Neft Şirkətinin əvvəlcə vitse-prezidenti, sonra isə birinci vitse-prezidenti olub. Ümummilli lider Heydər Əliyevin neft strategiyasının həyata keçirilməsində fəal iştirak edib.
1995 və 2000 illərdə Azərbaycan Respublikasının Milli Məclisinə üzv seçilib. 1997 ildən Azərbaycan Milli Olimpiya Komitəsinin Prezidentidir. 1999 ildə YAP sədrinin müavini, 2001 ildə sədrin birinci müavini, 2005 ildə isə partiyanın sədri seçilib. 2001-03 illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olub. 2003 ilin yanvar ayında isə Avropa Şurası Parlament Assambleyası sədrinin müavini, AŞPA-nın Büro üzvü seçilib. 2003 il avqustun 4-də Milli Məclisdə təsdiq edildikdən sonra Azərbaycan Respublikasının Baş naziri təyin olunub. Bununla əlaqədar deputat səlahiyyətlərinə xitam verilib.
İlham Əliyev 2003 il oktyabrın 15-də Azərbaycan Respublikasının Prezidenti seçilib. Prezident seçkilərində seçicilərin 76 faizindən çoxu İlham Əliyevin lehinə səs verib. 2004 ildə Avropa Şurası Parlament Assambleyasının fəxri üzvü diplomu və medalı ilə təltif edilib. 2008 il oktyabrın 15-də keçirilən seçkilərdə seçicilərin 88,73 faiz səsini qazanan İlham Əliyev ikinci dəfə Azərbaycan Respublikasının Prezidenti seçilib. 2013 il oktyabrın 9-da keçirilən seçkilərdə isə seçicilərin 84,54 faiz səsini qazanan İlham Əliyev növbəti dəfə Azərbaycan Respublikasının Prezidenti seçilib. 2018 il aprelin 11-də keçirilən seçkilərdə də İlham Əliyev seçicilərin 86,02 faiz səsini qazanaraq yenidən Azərbaycan Respublikasının Prezidenti seçilib.
Azərbaycan, rus, ingilis, fransız və türk dillərini bilir.
Ordenlər: Rumıniyanın “Rumıniya Ulduzu” ordeni (11 oktyabr 2004), Səudiyyə Ərəbistanı Krallığının “Kral Əbdüləziz” ordeni (8 mart 2005), Rusiya Federasiyasının Təhlükəsizlik, Müdafiə və Hüquq Qaydası Problemləri Akademiyasının I dərəcəli “Aleksandr Nevski” ordeni (11 aprel 2005), Azərbaycan Respublikasının “Heydər Əliyev” ordeni (28 aprel 2005), Rus Pravoslav Kilsəsinin I dərəcəli “Müqəddəs Serqi Radonejski” ordeni (14 sentyabr 2005), Qafqaz Müsəlmanları İdarəsinin “Şeyxülislam” ordeni (22 dekabr 2005), Fransa Respublikasının “Fəxri Legionun Böyük Xaç Komandoru” ordeni (29 yanvar 2007), Polşa Respublikasının “Xidmətlərə görə” Böyük Xaç ordeni (26 fevral 2008), Ukraynanın I dərəcəli “Knyaz Yaroslav Mudrı” ordeni (22 may 2008), Küveyt Dövlətinin “Mübarək əl-Kəbir” ordeni (10 fevral 2009), Latviya Respublikasının “Üç Ulduz” ordeninin “Böyük Xaç Kavaleri” dərəcəsi (10 avqust 2009), Rus Pravoslav Kilsəsinin “I dərəcəli Şöhrət və Şərəf” ordeni (24 aprel 2010), Rumıniyanın “Sadiq Xidmət” milli ordeninin Böyük Xaç ranqı (18 aprel 2011), Rumıniyanın “Sadiq Xidmət” milli ordeni (18 aprel 2011), Bolqarıstan Respublikasının “Stara Planina” ordeni (14 noyabr 2011), Tacikistan Respublikasının “İsmoili Somoni” ordeni (12 iyul 2012), Belarusun “Xalqlar dostluğu” ordeni (28 avqust 2012), “Serbiya Respublikasının lentli Ordeni” (22 fevral 2013), Türkiyə Respublikasının “Dövlət nişanı” ordeni (12 noyabr 2013), Ukraynanın “Azadlıq” ordeni (18 noyabr 2013), Türk Dünyasının Ali Ordeni (12 noyabr 2021).
Fəxri elmi adlar:
Moskva Dövlət Beynəlxalq Münasibətlər İnstitutunun fəxri doktoru (7 fevral 2004), Lev Qumilyov adına Qazaxıstan Dövlət Avrasiya Universitetinin fəxri professoru və “Qızıl döyüşçü” medalı (1 mart 2004), Türkiyənin Qırıqqala Universitetinin fəxri doktoru (25 mart 2004), Türkiyənin Bilkənd Universitetinin fəxri doktoru və İhsan Doğramacı adına Dünya Sülh Mükafatı (14 aprel 2004), Rumıniyanın Ployeşti Neft-Qaz Universitetinin fəxri doktoru (12 oktyabr 2004), Bolqarıstan Milli və Dünya Təsərrüfatı Universitetinin fəxri professoru (23 sentyabr 2005), Koreya Respublikasının Kyunq He Universitetinin fəxri doktoru (24 aprel 2007), İordaniya Universitetinin fəxri doktoru (29 iyul 2007), Macarıstanın Korvinus Universitetinin fəxri doktoru (18 fevral 2008), Moskva Dövlət Universitetinin fəxri professoru (21 fevral 2008), Taras Şevçenko adına Kiyev Milli Universitetinin fəxri doktoru (22 may 2008), Məxdumqulu adına Türkmənistan Dövlət Universitetinin fəxri professoru (28 noyabr 2008), Bakı Dövlət Universitetinin fəxri doktoru (2 noyabr 2009), Belarus Dövlət Universitetinin fəxri professoru (12 noyabr 2009), Tacikistan Milli Universitetinin fəxri doktoru (16 oktyabr 2014), Çinin Renmin Universitetinin “Tarix üzrə fəxri professor” diplomu (11 dekabr 2015).
İdman təşkilatlarının mükafatları:
Dünya Taekvondo Federasiyasının 6-cı Dan Qara kəməri və sertifikatı (10 oktyabr 2003), Beynəlxalq Güləş Federasiyasının (FİLA) xüsusi mükafatı (3 aprel 2004), Beynəlxalq Olimpiya Komitəsinin “Olimpiya” ordeni (19 aprel 2004), Avropa Həvəskar Boks Assosiasiyasının xüsusi mükafatı (1 may 2004), Beynəlxalq Hərbi İdman Şurasının “Böyük Kordon” Şərəf ordeni (27 may 2005), MDB Ölkələri İdman Təşkilatlarının Beynəlxalq Konfederasiyasının Fərqlənmə nişanı (26 sentyabr 2005), Beynəlxalq Güləş Federasiyasının (FİLA) “İdman əfsanəsi” medalı (17 sentyabr 2007), Belarus Milli Olimpiya Komitəsinin ali mükafatı (26 oktyabr 2007), Azərbaycan Milli Olimpiya Komitəsinin “Olimpiya” ordeni (27 dekabr 2007), Ümumdünya Karate Federasiyasının Fəxri 9-cu Dan dərəcəsinin diplomu (20 mart 2008), Avropa Ədalətli Oyunlar Hərəkatının “Şərəf” nişanı (15 may 2009), Beynəlxalq Paralimpiya Komitəsinin ali paralimpiya mükafatı (26 iyun 2015).
Mənbə: Tərcümeyi-hal “PREZİDENT” Azərbaycan Prezidentinin Rəsmi internet səhifəsi (president.az)
