(27.4.1947, Göycay ş.) – Azərb. Resp. Dövlət Neft Şirkətinin “Neftqazelmitədqiqatlayihə” İnstitutunun aparıcı elmi işçisi, texnika e.d. (2018), prof.

AZNKİ-nin Neftmexanika fakültəsini bitirib (1969). 1969-72 illərdə layların ayrı-ayrılıqda və eyni zamanda istismarı üzrə Xüsusi Konstruksiya Bürosunda ikinci dərəcəli konstruktor vəzifəsində çalışıb. 1972 ildə müsabiqə yolu ilə M.Əzizbəyov adına AZNKİ-nin Nəzəri Mexanika kafedrasında işə başlayıb və 1998 ilədək həmin kafedrada assistent, baş müəllim və dos. vəzifələrində çalışıb. Abbasov 1989 ildə Мoskva Dövlət Тexniki Universitetində “Maşınların, cihazların və aparatların dinamikası, möhkəmliyi” ixtisası üzrə “Boru kəmərinin və mayenin dinamikasını nəzərə alaraq pakerlərin hermetiklik qabilliyyətinin artırılması metodlarının işlənməsi” mövzusunda namizədlik dissertasiyasını müdafiə edərək texnika ü.f.d. alimlik dərəcəsi alıb.

1991 ildən AZNKİ-nin Nəzəri Mexanika kafedrasının dos. vəzifəsində çalışan Abbasov 1998 ildən etibarən ardıcıl olaraq SOCAR “Dənizneftqazlayihə” DETLİ-nin “Neftqazçıxarmada mürəkkəbləşmələrlə vibrotəsir üsulu ilə mübarizə” və “Yeraltı hidrodinamika” laboratoriyalarının müdiri, sonradan isə bu laboratoriyaların bazasında yaradılmış “Quyuların istismar üsullarının layihələndirilməsi və optimallaşdırılması” şöbəsində şöbə rəisi vəzifəsində işləyib. O, 2001-10 illər ərzində H.Əliyev adına Azərb. Ali Hərbi Məktəbin Mexanika kafedrasının, daha sonra isə BDU-nun Nəzəri mexanika və bütöv mühit mexanikası kafedrasının dos. vəzifəsində çalışıb. Abbasov 2018 ildə “Neftqazçıxarma sistemlərində inteqral modelləşdirilmənin elmi əsaslari” mövzusunda doktorluq dissertasiyası müdafiə edib. O, 90-dan artıq elmi məqalənin, 12 ixtiranın müəllifidir.

Məlumat V.Abdullayevdən alınıb.