Müasir Göyçay r-nunun ərazisində türk qəbilələrinin əyyami qədimdən məskən salması Çaxırlı k-nin adından bəlli olur. Tədqiqatçılar Azərb. ərazisində olan bir  yer adlarını bolqar qəbiləsi Çakarla əlaqələndirirlər. Məlumdur ki, bolqarlar ən qədim türk tayfalarından biridir. Moisey Xorenskinin (V əsr) məlumatına əsasən bolqarlar Qafqaza ilk dəfə e.ə. II əsrdə gəlmişlər. Qeyd edək ki, qədim Azərb. dastanı “Kitabi-Dədə Qorqud”-da bolqar adları çəkilir.

Mövzu ilə əlaqəli araşdırma apardığımız zaman bizə aydın oldu ki, vaxtilə bu k-də 3 məscid varmış. Əfsuslar olsun ki, r-nun ikinci böyük k-i olan Çaxırlıda indi kiçik bir məscid vardır. Məscid 1998 ildə İslam İrsinin Dirçəliş Cəmiyyəti tərəfindən tikilmişdir.

Binanın ümumi sahəsi 128 kv. m-dir. İbadət zalı (8 m x 14 m) 112 kv.m-dir. Bu zalın ş.-də və q.-də 4 olmaqla 8 pəncərəsi və zala daxil olmaq üçün 2 giriş qapısı vardır. Qapılar şm. hissədəndir. Qapı və pəncərə başlarının arkalı olması binanın gözəlliyinə xüsusi ahəngdarlıq verir. Binanın 2 m enində tac şəkilli sütunlarla bağlanmış məscid eni boyu uzanan eyvanı vardır. Məscidin minarəsi təqribən 10 m hün.-də olub, binaya bitişik, səkkizguşəli formada inşa edilmişdir. Minarənin günbəzi və məscidin damı ağ dəmir örtüklə örtülmüşdür. Məscidin inşasında yerli inşaat materiallarından istifadə olunmuş və başdan-başa mişar daşı ilə tikilmişdir.

Mənbə: İ.Musayev. “Göyçay rayonundaki dini abidələr və tarixi şəxsiyyətlər”, Bakı, İpəkyolu, 2014, s. 61-62