(1932, Göyçay ş.) – dövlət xadimi, SSRİ Ali Sovetinin deputatı (1988-91), Gəncə ş. Xalq Deputatları Sovetinin sədri.
Göyçay ş. 4 saylı orta məktəbi bitirdikdən sonra Azərb. Sənaye İnstitutuna qəbul olub, 1954 ildə həmin institutu bitirərək təyinatla Sumqayıt Alüminium zavoduna işləməyə göndərilib. 1959 ildən həmin zavodun baş mexaniki təyin olunub. 1962 ildə Gəncədə tikilən Alüminium zavodunun avadanlıqla təchiz edilməsində xidməti olub. 1967 ildə Azərb.-da yaradılan xüsusi Tikinti-Quraşdırma İdarəsinin müdiri, 1970 ildə isə Gəncədəki İttifaq əhəmiyyətli Alüminium zavodunun direktoru vəzifəsinə təyin olunub. 1977 ildə Gəncə ş. Xalq Deputatları Sovetinin sədri seçilib və üç ilə yaxın bu vəzifədə işləyib. 1980-88 illərdə Əlvan Metalların Emalı zavodunda direktor işləyib.
1988 ildə II dəfə Gəncə Şəhər Xalq Deputatları Sovetinə sədr seçilib və Azərb. Ali Sovetinin deputatı olub. Elə həmin ildən 1990 ilin mayına kimi şəhər Partiya Komitəsinin I katibi vəzifəsində çalışıb. Bundan sonra SSRİ Ali Sovetinin deputatı kimi Sənaye və Energetika Komitəsində fəaliyyət göstərib. İşlədiyi müddət ərzində yaxşı işinə görə çoxlu sayda fəxri fərmanlara, orden və medallara, o cümlədən “Azərb. SSR Əməkdar səmərələşdiricisi” fəxri adı (1960), “Qırmızı Əmək Bayrağı” və “Şərəf nişanı” ordenlərinə (1971-72), dövlət qulluqçusu təqaüdçüsü (1995) adına layiq görülüb.
