Məmmədov Namiq Hadi oğlu (4.7.1956, Göyçay ş.) – şair, filoloq, AYB-nin üzvü (2006).

1963 ildə birinci sinfə getmiş, 1973 ildə orta təhsilini başa vurmuşdur. 1973-78 illərdə AzPİ-nin Texnologiya mühəndisi fakültəsində təhsil almışdır. Gənc yaşlarından klassik ədəbiyyata, poeziyaya maraq göstərmiş, bir müddət şeirlər yazmışdır. İndiyədək iki kitabı çap olunmuşdur. Birinci kitab “Gördüm vəfasını 50 il ömrün” adlanır. Bu kitabda aşıq şeir formalarında – qoşma, təcnis, gəraylı və klassik üslubda yazdığı satirik qəzəlləri toplanmışdır.

Babası, “Lenin adına Qırmızı Əmək Bayrağı” ordenli (1949) müəllim Əhməd Əfəndidən Quran dərsi almış və bundan sonra dini elmlərlə də maraqlanmağa başlamışdır. Mərhum akademik Vasim Məmmədəliyevin təklifi ilə “Türk paşası Nişançı paşaya məktub” əsərini müasir dilimizə çevirmiş və “Quranın endirilməsi” adı ilə ona elmi şərh yazmışdır. Məhəmməd Füzuliyə həsr etdiyi bu əsərlə Namiq Hadi həm də bu mövzunu ilk dəfə işıqlandırmışdır.

Məlumat A.Əhmədlidən alınıb.