(1960, Göyçay r-nu) – iqtisadçı, iqtisad ü.f.d. (2009).

D.Bünyadzadə adına Xalq Təsərrüfatı İnstitutunun (indiki ADİU) Xalq təsərrüfatının planlaşdırılması və iqtisadiyyatı fakültəsini bitirib (1984). “Azərenerji”-nin “İstilik şəbəkələri və suqızdıran qazanxanalar” müəssisəsində böyük iqtisadçı (1982-87), həmin müəssisədə direktor müavini (1987–2000), Bakı ş. İH “Bakı istilikşəbəkə” İB-də baş direktor müavini (2000-01), Bakı ş. İH 2 saylı İstilik İdarəsində rəis müavini (2001-04), Bakı ş. İstilik İdarəsində rəis müavini (2004-05) vəzifələrində işləyib. 2005 ildə “Azəristiliktəchizat” ASC-nin sədr müavini vəzifəsinə təyin olunub. 2006-09 illərdə AR İqtisadi İnkişaf Nazirliyi İqtisadi İslahatlar Mərkəzinin dissertantı olub. 2009 ildə “Azərbaycanın istilik təchizatı sisteminin inkişafının modelləşdirilməsi” mövzusunda namizədlik dissertasiyasını müdafiə edərək iqtisad ü.f.d. elmi dərəcəsi alıb. Azərb. Resp. Prezidentinin 2022 il fevralın 7-də imzaladığı Sərəncama uyğun olaraq Mirzəliyev “Azəristiliktəchizat” ASC-nin sədri vəzifəsinin müvəqqəti icraçısı təyin olunub.

“Tərəqqi” medalı ilə təltif olunub (2015).

Mənbə: Göyçay rayon Mərkəzləşdirilmiş Kitabxana Sistemi.

(1905, Göyçay qəz. Bəydövül k. – 1947) – aşıq.

Şirvan aşıq mühitinin yetirməsidir. Erkən yaşlarından aşıq sənətinə maraq göstərib. Aşıq sənətinin sirlərini ilk əvvəl Aşıq Xas Məmməddən öyrənib. Daha sonra Şirvan aşıqlarının atası sayılan Aşıq Mizə Bilalın yanına gəlib və mükəmməl aşıq kimi yetişib. Ağır məclislər aparıb, sazı-sözü ilə yaddaşlara adını yazdırıb. Sovet-alman müharibəsinə gedib (1941) və orada ağır yaralanaraq qayıdıb.

Mənbə: “Ozan-aşıq ensiklopediyası”. 2 cilddə. Aşıqlar Birliyi, I cild, Bakı, 2019, “Gənclik”, s. 122.

(20.6.1971, Bakı ş.) – həkim, tibb ü.f.d. (2008), RF EA-nın prof. (2016), RF EA-nın müxbir üzvü (2019).

Əməkdar həkim Ənvər Musayevin nəvəsi, tibb ü.f.d. Rasim Ənvər oğlu Musayevin oğludur.

1987-93 illərdə ATU-da təhsil alıb. 1993-99 illərdə Rusiyada Bloxin adına Onkoloji Mərkəzdə internaturanı, ordinaturanı və aspiranturanı bitirib. 1999 ildə dissertasiya müdafiə edərək tibb ü.f.d. alimlik dərəcəsi alıb. 2008 ildə doktorluq dissertasiyasını müdafiə edib. 2006 ildən yeni yaradılan Moskva Onurğa Cərrahiyyəsi İnstitutuna rəhbərlik edir. 2017 ildə Azərb. Resp. Prezidenti İlham Əliyevin Fərmanı ilə “Tərəqqi” medalı ilə təltif edilib. 2019 ildə Rusiya EA-nın müxbir üzvü seçilib. 90 elmi əsərin, 4 monoqrafiyanın müəllifidir. Musayev 2 yeni kəşf üçün patent alıb. Hal-hazırda Bloxin adına Onkologiya İnstitutunda və Seçenev adına Universitetin Onkologiya kafedrasında elmi fəaliyyətini davam etdirir.

Məlumat A.Məmməddən alınıb.

(1910, Göyçay qəz. Şəkər k. – 1989) – aşıq.

Əbülfəzin atası Şükür də aşıq olmuşdur. Aşıqlığa maraq da elə ailədən başlamışdır. Atası ona sənəti öyrənməkdə, aşıq kimi yetişməkdə həmişə yardımçı olmuşdur. Aşıq dastanlarının yaxşı ifaçısı və söyləyicisi olmuşdur. Saz havalarını dəqiqliklə çala bilmək qabiliyyəti varmış. “Nigar-Mahmud”, “Ordubadlı Kərim” dastanlarının mükəmməl variantları onun dilindən yazıya alınmışdır. Aşıq şeirinin müxtəlif şəkillərində nümunələr yaratmışdır.

Mənbə: “Ozan-aşıq ensiklopediyası”. 2 cilddə, Aşıqlar Birliyi, “Gənclik” nəşriyyatı, II cild, Bakı, 2020, s. 160.

(2.8.1920, Göyçay qəz. Potu k. – 28.5.1997, Göyçay ş.) – səhiyyə işçisi, Əməkdar həkim (1960).

Ə.Musayev 1938 ildə Göyçay ş. 1 nomrəli orta məktəbini əlaçı attestatı ilə bitirərək həmin ildə Azərb. Dövlət Tibb İnstitutuna imtahansız qəbul olunub. 1942 ildə ATU-nu bitirdikdən sonra Zərdab r-nu Malyariya Stansiyasının müdiri vəzifəsinə təyin edilib. 1942-45 illərdə həmin vəzifədə işləmiş, 1946 ilin yanvar ayında Göyçay r-nu Malyariya Stansiyasının müdiri vəzifəsinə təyin edilmişdir. 1956-76 illərdə Göyçay Mərkəzi Xəstəxanasının baş həkimi və r-n səhiyyə şöbəsinin müdiri, 1976-92 illərdə Göyçay Sanitar maarifləndirmə şöbəsinin müdiri vəzifəsində çalışmışdır. Ə.Musayev 50 il səhiyyə sistemində qüsursuz fəaliyyət göstərmişdir. Zərdab və Göyçay r-nlarında malyariya xəstəliyinin müalicəsində onun böyük əməyi vardır. O, Göyçay r-nunda difteriya, skarlatin, yatalaq, qarın yatalağı, polimiyelit və s. xəstəliklərin aradan qaldırılmasında böyük təşkilatçılıq işi aparmışdır. Sanitariya mədəniyyətinin yüksəldilməsi uğrunda keçmiş Sovet İttifaqında məşhur olan Göyçay hərəkatının təşkilatçılarından biri sayılır. R-n partiya komitəsinin plenum üzvü, r-n Xalq Deputatları Sovetinin İcraiyyə Komitəsinin üzvü olmuşdur.

(24.6.1986, Göyçay r.) – pedaqoq, ilahiyyat ü.f.d. (2013), ilahiyyatçı.

1992 ildə Göyçay r-nu Nizami Gəncəvi adına 7 saylı orta məktəbinin birinci sinifinə daxil olmuş və 2003 ildə orta məktəbi bitirib. Həmin il Bakı İslam Universitetinin Zaqatala şöbəsinin İlahiyyat fakültəsinə daxil olub, 2008 ildə universiteti fərqlənmə diplomu ilə bitirib. 2008 ildə Türkiyə Resp. Uludağ Universiteti Sosial Elmlər İnstitunun Fəlsəfə və Din Elmləri kafedrasında magistratura pilləsində təhsilini davam etdirmişdir. 2010 ildə “Azərbaycanda ailədə dini təhsil” adlı dissertasiyanı müdafiə edərək Din Pedaqogikası üzrə magistr dərəcəsi almışdır. 2010 ildə həmin universitetdə doktorantura təhsilinə başlayan Musayev, 2013 ildə “Əlillərin dini təhsili” adlı dissertasiyanı müdafiə edərək doktorluq elmi dərəcəsi almışdır.

(30.12.1915, Şamaxı ş. – 10.2.1991, Bakı ş.) – geoloq.

1918 ildə erməni daşnaklarının Şamaxıda törətdikləri qırğınlardan sonra ailəsi ilə birgə Göyçaya pənah gətirib. 1938 ildə Azərb. Sənaye İnstitutunu mühəndis-geoloq ixtisası üzrə bitirib və Azərb. SSR Nazirlər Soveti yanında Geologiya İdarəsində işə başlayıb. 1938-40 illərdə Qaradağ Sement Zavodu üçün əhəng daşı və gil axtarışları ilə məşğul olub. Böyük Vətən müharibəsi iştirakçısı olan Musayev 24-cü Qafqaz diviziyasının 3-cü alayında kimyayönlü rotada Sevastopola göndərilib. Döyüşlərin birində əsir düşüb. Lakin bir neçə dəfə əsir düşərgəsindən qaçıb. 1944 ildə Sovet Ordusu Sevastopolu azad edənədək Krımın Kolay ş.-də çalışıb. 1945 ildə Musayev Bakı qarnizonu hərbi tribunalının hökmü ilə ittiham olunur və ona 10 il iş kəsilir.

(2.8.1944, Göyçay ş. – 15.11.2019, Bakı ş.) – həkim-cərrah, tibb ü.f.d. (1974).

Musayev 1951-62 illərdə Göyçay ş. 3 saylı orta məktəbdə təhsil alıb və məktəbi qızıl medalla bitirib. 1962 ildə ATU-nun Müalicə-profilaktika fakültəsinə daxil olub. 1967 ildə institutu fərqlənmə diplomu ilə başa vurub. 1967-72 illərdə Azərb. Dövlət Həkimləri Təkmilləşdirmə İnstitutunda Döş Cərrahiyyəsi kafedrasında çalışıb. 1972 ildə Azərb. Dövlət Həkimləri Təkmilləşdirmə İnstitutunun Ürək Cərrahiyyəsi şöbəsinin müdiri vəzifəsinə təyin edilib. Tibb sahəsindəki fədakar əməyinə görə “Səhiyyə əlaçısı” fəxri adına layiq görülüb. 1994 ildə Travmatologiya və Ortopediya kafedrasında uşaq şöbəsinin müdiri vəzifəsinə təyin edilib. Yaxşı işinə görə dəfələrlə fəxri fərmanlara layiq görülüb.

Məlumat A.Məmməddən alınıb.

(27.7.1947, Göyçay ş.) – fizika-riyaziyyat ü.f.d. (1980).

1965-70 illərdə BDU-nun Fizika fakültəsində təhsil alıb. 1973-74 illərdə AMEA Fizika İnstitutunda mühəndis vəzifəsində çalışıb. 1975-79 illərdə Rusiyanın Fizika-Energetika İnstitutunun aspirantı olub. 1980 ildə Moskva ş.-də dissertasiya müdafiə edərək fizika-riyaziyyat ü.f.d. alimlik dərəcəsi alıb. 1982-84 illərdə Moskva ş.-dəki Ümumittifaq Atom Energetikası Elmi-tədqiqat İnstitutunda kiçik elmi işçi, 1984-86 illərdə Moskva ş.-dəki Ümumittifaq nəzarət-ölçü istehsalat birliyi institutunda baş elmi işçi, 1986-89 illərdə isə Tibbi-bioloji problemlər institutunda Sektor müdiri vəzifəsində çalışıb. 1990–2011 illərdə BDU Radiasiya və onun ətraf mühitə təsiri fakültələrarası Elmi-tədqiqat Laboratoriyasında laboratoriya rəhbəri olub. 29 elmi əsəri müxtəlif jurnallarda çap edilib. Hazırda “Radiasiya və onun ətraf mühitə təsiri” fakültəarası ETL-in aparıcı elmi işçisidir.

Məlmat V.Abdullayevdən alınıb.

(14.9.1933, Göyçay r-nunun Cəyirli k.) – mühəndis-mexanik.

1939-46 illərdə yeddiillik kənd məktəbində təhsil alıb. Oranı bitirdikdən sonra Göyçay ş.-də yeni açılmış Kənd Təsərrüfatının Mexanikləşdirilməsi Texnikumuna qəbul olub, 1949 ildə texnikumu fərqlənmə diplomu ilə bitirib və bu səbəbdən həmin ildə imtahan vermədən Azərb. Kənd Təsərrüfatı İnstitutunun Mexanikləşdirmə fakültəsinə daxil olub. 1954 ildə ali təhsilini başa vurduqdan sonra təyinatla Göyçay r-nu Qaraməryəm MTS-ə göndərilmiş və orada sahə mexaniki, nəzarətçi mexanik, emalatxana müdiri və baş mühəndis vəzifələrində çalışıb.