(7.9.1956, Göyçay ş.) – polis polkovniki, sərbəst güləş üzrə SSRİ idman ustası.

Orta məktəbi bitirəndən sonra Almaniyada hərbi xidmət keçib. Hərbi xidmətdən sonra bir müddət Göyçay uşaq-gənclər idman məktəbində məşqçi işləyib. 1977 ildə Moskvaya köçüb və burada hüquq-mühafizə orqanlarında işə qəbul olunub. Eyni zamanda idman fəaliyyətini də davam etdirən R.Babayev 1979 ildə Moskva vilayət Pedaqoji İnstitutunun Fiziki tərbiyə fakültəsinə daxil olub. 1983 ildə yeniyetmələrin işi üzrə müfəttiş, 1986 ildə cinayət axtarışı üzrə əməliyyat müvəkkili, bir müddət sonra isə baş əməliyyat müvəkkili təyin olunub.

(22.3.1932, Göyçay r-nunun Alpout k. – 2.4.2014, Göyçay r-nunun Alpout k.) –kənd təsərrüfatı işçisi.

İlk təhsilini 1939 ildə Göyçay r-nunun Alpout k. 7-illik məktəbində alıb. 1946 ildə həmin məktəbi bitirib. Məktəbi bitirdikdən sonra kənd kolxozunda əmək fəaliyyətinə başlayıb.

1950-53 illərdə hərbi xidmətdə olub. Hərbi xidmətdən qayıtdıqdan sonra kolxozda əmək fəaliyyətini davam etdirib. Həmin dövrdə kolxozda işləməklə yanaşı, 1966-69 ildə Alpout k. 10-illik məktəbinin nəzdində açılan gecə kursunda 10-illik təhsilini başa vurmuşdur. Moskvada, Kremldə 1969 il 25-27 noyabr tarixlərində keçirilən Üçüncü Ümumittifaq Kolxozçular Qurultayında Göyçay ş. üzrə nümayəndə olub. Əmək fəaliyyəti dövründə göstərdiyi xidmətlərə görə SSRİ Ali Soveti Rəyasət Heyəti adından 31 mart 1970 il tarixli “Vladimir İliç Leninin anadan olmasının 100 illiyi münasibətilə” yubiley medalı, Həmkarlar İttifaqının MK adından “1978 ilin Sosialist Yarışının qalibi” medalı, 19 noyabr 1975 ildə “Doqquzuncu beşilliyin zərbəçisi” döş nişanı ilə təltif edilib. 22 may 1989 ildə İkinci dərəcəli suvarma ustası adına layiq görülüb.

Məlumat ailəsindən alınıb.

(8.3.1959, Göyçay ş.) – iqtisadçı alim, iqtisad ü.f.d. (1993), dos. (2001).

1976-80 illərdə Azərb. Dövlət Xalq Təsərrüfatı İnstitutunda təhsil alıb və oranı fərqlənmə diplomu ilə bitirərək iqtisadçı ixtisasına yiyələnib. Azərb. Dövlət Xalq Təsərrüfatı İnstitutunu (indiki ADİU) fərqlənmə diplomu ilə bitirib (1980). 1980-89 illərdə Azərb. Dövlət Plan Komitəsi yanında Elmi-Tədqiqat İqtisadiyyat İnstitutunda iqtisadçı vəzifəsindən baş elmi işçi vəzifəsinə qədər yüksəlib. 1989-92 illərdə Azərb. Dövlət Plan Komitəsində, Azərb. Dövlət İqtisadiyyat və Planlaşdırma və Azərb. Dövlət İqtisadiyyat Komitəsində baş mütəxəssis, bölmə və şöbə müdiri vəzifələrində çalışıb. 1994 ildən ADİU-nun Qiymət və qiymətləndirmə kafedrasında çalışır. Beynəlxalq və respublika elmi-praktiki konfranslarında, elmi konqres və seminarlarda məruzələrlə çıxış edib, yerli və xarici mətbuat səhifələrində elmi məqalələr dərc etdirib. Qiymətin əmələ gəlməsi və qiymətləndirməyə aid 2 dərsliyin, 2 dərs vəsaitinin, 30-a qədər elmi məqalənin, çoxlu sayda proqram və metodiki göstərişlərin müəllifidir.

(15.12.1909, Bakı yaxınlığındakı Əmircan k.-14.10.1974, Moskva; Əmircanda dəfn edilmişdir) – Azərb. rəssamı, müasir Azərb. boyakarlıq sənətində mənzərə janrının yaradıcılarından biri. Azərb. SSR xalq rəssamı (1963). Azərb. SSR Dövlət mükafatı laureatı (1972).

Azərb. Rəssamlıq Məktəbində (1927-31) və V.İ.Surikov ad. Moskva Dövlət Rəssamlıq İnstitutunda (1933-1940) təhsil almışdır. Təhsildən qayıtdıqdan sonra tarixi mövzular və tarixi şəxsiyyətlərin təsviri (“Babək üsyanı”, “Fətəli xan”, “Xəttat Mir Əli” və s.) yaradıcılığında əsas yer tutmuşdur. Müharibədən sonrakı illərdə o, mənzərə janrında daha bitkin əsərlər yaratmışdır. 1946-47 illərdə respublika bədii sərgilərində Abşeron etüdləri (“Buzovnada neft mədənləri”, “Əmircan” və s.) nümayiş etdirilmişdir. “Bakıda atəşfəşanlıq” (1947), “Qudyalçay sahili”, “Qudyalçay vadisi”, “Qızbənövşəyə gedən yol” (1953), “Doğma düzənliklər” (1955), “Yuxarı Daşaltı” (1955), “Yaşıl xalça”, “Cıdır düzü” (1957) və s. mənzərələrində tədricən rəng palitrasını zənginləşdirmiş, tablolarında koloritin dekorativliyinə nail olmuşdur.

(6.3.1964, Göyçay r-nunun Alıkənd k.) – Əməkdar mühəndis (2016).

İlk əmək fəaliyyətinə çilingər (1981) kimi başlayıb. 1989 ildə Azərb. İnşaat Mühəndisləri İnstitutunun (indiki AzMİU) Sənaye və mülki tikinti fakültəsini İnşaat mühəndisi ixtisası üzrə bitirib. Həmin ildən etibarən ölkənin ictimai-siyasi proseslərində fəal iştirak etməklə yanaşı, gənc mütəxəssis kimi neft sənayesində layihəçi mühəndisdən başlayaraq ardıcıl olaraq, aparıcı mühəndis, qrup rəhbəri, baş mütəxəssis, şöbə rəisi, Əməyin mühafizəsi və keyfiyyətə nəzarət xidmətinin rəisi kimi çalışıb. 2005-11 illərdə SOCAR-ın Təlim Tədris Sertifikatlaşdırma departamentinin direktoru işləyib, 2011 ildən etibarən SOCAR-ın Baş ofisinin İR Departamentinin rəisi kimi çalışır.

(20.9.1934, Göyçay r-nunun Hacalıkənd k. – 24.9.2017, Bakı ş.) – Azərb. hidromelioratoru, kənd təsərrüfatı e.d. (2003), prof. (2014).

AzPİ-nin (indiki AzTU) Hidromeliorasiya fakültəsini hidrotexnika mühəndisi ixtisası üzrə bitirib (1957). Əmək fəaliyyətinə Baş Kür–Araz Sutinkinti İdarəsinin Göyçay r-nunda yerləşən 3 saylı Sutikintiquraşdırma İdarəsində usta kimi başlamışdır. Daha sonra fəaliyyətini Göyçay kənd təsərrüfatını mexanikləşdirmə və elektrikləşdirmə texnikumunda müəllim, metodist və qiyabi şöbə müdiri (1958-65) kimi davam etdirmişdir. 1965 ildə Azərb. Elmi Tədqiqat Hidrotexnika və Hidromeliorasiya İnstitutunun aspiranturasına daxil olmuş, Novoçerkassk Meliorasiya mühəndisləri İnstitutuna göndərilərək orada dünya şöhrətli akademik B.Şumakovun elmi rəhbərliyi ilə aspiranturanı tamamlamışdır. 1968-70 illərdə “AzETN və Mİ”-nin “Suvarma” və “Meliorasiya olunmuş torpaqların mənimsənilməsi” şöbələrində kiçik elmi işçi vəzifəsində çalışmış, 1973 ildə isə həmin şöbədə böyük elmi işçi vəzifəsinə təyin olunmuşdur.

(11.12.1955, Göyçay r-nunun Bığır k.) – tarixçi alim, tarix ü.f.d. (1992), dos. (2008).

ADU-nun (hazırda BDU) Tarix fakültəsini bitirib. 1980-93 illərdə ADU-nun “Yeni və ən yeni tarix” kafedrasında laborant, baş laborant, müəllim kimi çalışıb. 1993-94 illərdə Azərb. Resp. Nazirlər Kabineti yanında Xarici Turizm Şurasının “Turizm işinin təşkili və xidmət” şöbəsinin müdiri, 1994–2001 illərdə Azərb. Resp. Xarici Turizm Şurası nəzdindəki “Azərtur” turizm müəssisəsində “Xarici turizmin təşkili” şöbəsinin rəisi, 2001-03 illərdə Azərb. Turizm Sənayesinin İnkişafı İttifaqında aparıcı mütəxəssis kimi fəaliyyət göstərib. 2003-06 illərdə Bakı Bədən Tərbiyəsi və Turizm Kollecində çalışıb. Uzun müddət ATMU-da “Turizm biznesi” kafedrasının müdiri və həmin kafedranın dosenti vəzifəsini tutub. Hazırda həmin universitetin “Turizm və qonaqpərvərlik” fakültəsinin dekanıdır. B.Bilalov Azərb.-da turizmin inkişafına yönəlmiş bir sıra layihələrin hazırlanmasında iştirak edib.

(15.7.1933, Göyçay ş. – 27.8.1996, Bakı ş.) – texnika ü.f.d. (1967).

Bakı texnoloji maşınqayırma texnikumunu fərqlənmə ilə bitirib, Leytenant Şmidt adına (indiki Səttarxan adına) zavodda konstruktor, usta, sex rəisi, növbə rəisi işləyib. 1953-56 illərdə İsmayıllı r. İvanovka kənd MTS-in rəhbəri olub. 1956 ildə doğma zavoda qayıdıb. 1962 ildə M.Əzizbəyov adına Azərb. Neft və Kimya İnstitutunun (indiki Azərb. Dövlət Neft və Sənaye Universiteti) Neft-mexanika fakültəsini bitirib həmin zavodda ştanqa sexinin rəisi işləyib. 1976-82 illərdə Neft və Kimya İnstitutunda kafedra müdiri olub, 1962 ildə isə institutun xalq nəzarəti təşkilatının sədri seçilib. 1986-92 illərdə “Mühəndis qrafikası” fakültəsinin rəhbəri olub.

Məlumat V.Abdullayevdən alınıb.

(1927, Göyçay ş. – 2001, AFR) – pedaqoq, SSRİ Maarif əlaçısı (1976), Azərb. SSR Əməkdar müəllimi (1978).

Orta məktəbi bitirəndən sonra Göyçay pedaqoji məktəbinə daxil olub. Burada təhsilini başa vurub gənc riyaziyyat müəllimi kimi İvanovka k. məktəbinə təyinat alıb.

(1974, Göyçay r -nunun Potu k.) – pedaqoq, fizika-riyaziyyat ü.f.d (2001)

BDU-nun Fizika fakültəsini fərqlənmə diplomu ilə bitirib (1996). Bürcəliyev 1997 ildə BDU-nun əyani aspiranturasına daxil olmuş və 2000 ildə nəzəri və riyazi fizika ixtisası üzrə “Dərin qeyri-elastiki elektron-proton, proton-proton toqquşmasında spik effektlərinin kvantoxromodinamik tədqiqi” mövzusunda dissertasiya işini müdafiə etmişdir. 2001 ildə Ali Attestasiya Komissiyasının qərarı ilə fizika-riyaziyyat e.n. dərəcəsi almışdır. 2001-02 illərdə Göyçay ş. 2 saylı orta məktəbdə müəllim işləmişdir. 2002 ildən isə şəhər 7 saylı orta məktəbdə fizika müəllimi olaraq çalışır. Bürcəliyev 2010 ilin sentyabr ayından Göyçay RTŞ-də aparıcı məsləhətçi işləmişdir. 2015 ilin iyul ayında 2-ci dərəcəli dövlət qulluqçusu ixtisas dərəcəsi almışdır.

2015-22 illərdə Göyçay RTŞ-nin müdir müavini vəzifəsini icra edib. 2022 ildə Mərkəzi Aran Regional Təhsil İdarəsi (MARTİ) Göyçay bölməsinə sektor müdiri təyin olunmuşdur. Hazırda MARTİ Ucar bölməsinin sektor müdiridir.

Mənbə: A.Kəngərli. “Bir məktəbin tarixi”. Bakı, 2018.